Кăмăл вĕренÿ пĕрлешĕвĕ

Петĕр Хусанкай "Нимене" Сергеева Татьяна вулать

mixaj_58 — Sun, 05 Feb 2017 17:57:41 GMT

Петĕр Хусанкай "Виçĕ ывăл" Васильева Екатерина вулать

mixaj_58 — Sun, 05 Feb 2017 17:55:59 GMT

Петĕр Хусанкай "Шинель" Васильев Кирилл вулать

mixaj_58 — Sun, 05 Feb 2017 17:54:24 GMT

Юрататăп чĕлхене

mixaj_58 — Tue, 13 Jan 2015 18:51:21 GMT

Пирĕн çемьере текех

Калаçаççĕ чăвашла.

Çывăх та çемçе чĕлхе

Çĕклентерет кăмăла.

Асаттепе асанне,

Настя аппапа анне,

Йăмăк, шăллăм та атте –

Сакăр çын пĕр çемьере.

Эпир пурте – чăвашсем,

Кайри Карăк ялĕсем.

Чĕлхе пирĕншĕн паха,

Çăлкуç евĕр вăл таса.

Тĕлĕнетĕп çынсенчен –

Чĕлхерен ютшăннинчен.

Тĕрĕс мар ку, тĕрĕс мар,

Атьăр чунлăрах пулар.

Чи хакли те илемли –

Чăваш чĕлхи – чи кирли.

Ытти чĕлхене пĕлни –

Эс ăспа пуян пулни.

Юрататăп чĕлхене,

Тав тăватăп аннене –

Чĕлхене вĕрентнĕшĕн,

Ыр кун-çул пилленĕшĕн.

Харитонова Екатерина, 7а класс, Красноармейски шкулĕ

Чĕлхе вăл - ĕмĕрлĕх

mixaj_58 — Tue, 13 Jan 2015 18:49:11 GMT

Юратнă чĕлхене сума суса,

Хисеплесе хам çĕрĕм-шывăма,

Тăван халăхăма та ыр сунса

Çыратăп эпĕ çакă сăввăма.

Чăваш ачи калаçтăр чăвашла,

Нихçан ан мантăр йăх-несĕл ятне.

Унпа пĕрлех вĕрентĕр вырăсла,

Çÿле çĕклетĕр халăхăн чапне.

Чĕлхе вăл асаттемĕрсен парни,

Ăна упранă ĕмĕрсем хушши.

Чĕлхе вăл пирĕн пурнăçăн тĕвви,

Унран пахи тата мĕн-мĕн пур-ши?

Чĕлхе вăл – пурлăх. Нимпе çĕнейми,

Нимпе аркатайми, сивĕтейми.

Вăл – ĕмĕрлĕх, çук унран хакли,

Пĕрре вăл – пуринчен те илемли.

Çак чĕлхене хисеплемен çынна

Каçару çук çак çутă тĕнчере.

Сивлетĕп эп те чунтанах ăна,

Чĕнсе калатăп пĕтĕм чĕререн:

– Юратăр, савăр тăван чĕлхене,

Уççăн калаçăр пурте илтмелле.

Ан манăр, вăл – пирĕн çепĕç чĕлхе –

Мухтар та упрар тивĕçлипеле.

Харитонова Анастасия, 9б класс, Красноармейски шкулĕ

Чăваш чĕлхине юрататăп

mixaj_58 — Tue, 13 Jan 2015 18:47:21 GMT

Чăваш çĕр-шывне кăмăллатăп,

Тăван халăхпа мухтанатăп,

Чăваш чĕлхине юрататăп,

Трак ен çĕрĕнче пурăнатăп.

Шкулта тăрăшса вĕренетĕп,

Атте-аннене хисеплетĕп.

Вĕсемшĕн чунтан хĕпĕртетĕп.

Куллен ырă тĕслĕх илетĕп.

Ялан чăвашла калаçатăп,

Çавнах туссене те сунатăп.

Чĕлхе хăватне эп туятăп,

Чăваш пулнишĕн савăнатăп.

Шухăшăмпа инçе вĕçетĕп,

Малашлăх çăмхине сÿтетĕп.

Чĕлхе илемлĕхне сисетĕп,

Ăна хисеплеме сĕнетĕп.

Чĕлхе пуласлăхне шанатăп,

Ват çын халалне ас тăватăп.

Тăван чĕлхепе мухтанатăп,

Ăна упрамашкăн ыйтатăп.

Мефодьева Васелиса, 10б класс, Красноармейски шкулĕ

Тăван чĕлхе - чăваш чĕлхи

mixaj_58 — Tue, 13 Jan 2015 18:45:20 GMT

Чĕлхесенчен чи илемли –

Тăван чĕлхе – чăваш чĕлхи.

Çакна ăнлантăм пĕчĕклех.

Мĕн пур-ши халь унран пахи?

Вăл кирлĕ калаçма пире,

Вăл кирлĕ хутшăнма пире,

Эпир кам пулнине пĕлме,

Ăна мĕн ĕмĕр вĕренме.

Атте-аннепеле куллен

Эп калаçатăп чăвашла.

Тус-тантăшпа хăш-пĕр чухне

Калаçкалатăп вырăсла.

Акăлчанла та пит аван

Хăш чух ман шăранса тухать.

Нумай чĕлхе пĕлни – аван,

Ăса-тăна пуянлатать.

Чĕлхе пуртан – эпир пуян,

Ытти халăхпала пĕр тан.

Апла упрар ăна ялан,

Пĕтмешкĕн парар мар нихçан.

Козлова Надежда, 8 класс, Красноармейски шкулĕ

Çепĕç те пуян чĕлхе

mixaj_58 — Tue, 13 Jan 2015 18:43:44 GMT

Тăван чĕлхе! Тăван чĕлхе!

Пуян та çепĕç эс, хитре!

Ялан эс пул манпа пĕрле –

Юрлатăр ман вĕри чĕре.

Атте-анне те ман – чăваш,

Пур несĕл-хурăнташ – чăваш.

Апла пулсан – эп чăн чăваш,

Атьсем те пулĕç ман – чăваш.

Чăваш пулни вăл пысăк чап,

Вăл ăраскал, анне парни.

Эп уншăн питĕ савăнап –

Ĕçчен, сăпай чăваш çынни.

Нихçан ан хурлăр чĕлхене,

Ăна ан хăйăр тиркеме.

Вырнаçнă ĕмĕр чĕрене –

Туйса тăратăп илемне.

Мана вăл вăй-хăват парать,

Чун-чĕрене пуянлатать,

Юрлаттарать, ташлаттарать,

Тус-тăванпа хутшăнтарать.

Апла пулсассăн, тусăмсем!

Чĕлхе янратăр уççăнрах!

Эпир унпа калаçнăçем –

Пулар тата мăнаçлăрах.

Козлов Игорь, 9б класс, Красноармейски шкулĕ

Тăван чĕлхе

mixaj_58 — Tue, 13 Jan 2015 18:41:04 GMT

Тăван чĕлхе пурри – илем!

Чунра ыр туйăм çуратать.

Тăван чĕлхе пурри – телей!

Кашни çынна вăй-хал парать.

Тăван чĕлхе вăл çут хĕлхем!

Сÿнмест вăл, ялкăшсах тăрать.

Тăван чĕлхе вăл, эс пĕлсем –

Ыр ĕç тума çунат хушать.

Тăван чĕлхе вăл ман ăсра –

Ăна манмастăп нихăçан.

Тăван чĕлхе вăл ман ăшра –

Тухмасть вăл нихăçан чунран.

Уй-хир пек аслă ман чĕлхе,

Юман пек çирĕп ман чĕлхе,

Хĕвел пек ăшă ман чĕлхе,

Анне пек çепĕç ман чĕлхе.

Тăван чĕлхеçĕм, янăра!

Сассу сан кайтăр ян! та ян!

Чăвашлăха ялан упра!

Чăн-чăн чăваш эп – эс пуртан.

Ефремова Екатерина, 9б класс, Красноармейски шкулĕ

Илемлĕ ман тăван чĕлхе

mixaj_58 — Tue, 13 Jan 2015 18:39:31 GMT

Чăваш чĕлхи янранă чух

Хĕвел те ăшшăн туйăнать.

Чăваш юрри шăраннă чух

Ман çамрăк чунăм савăнать.

Эп чăвашла калаçнă чух

Пăхать анне те савăнса.

Эп чăвашла вуланă чух

Итлет атте мăнаçланса.

Илемлĕ ман тăван чĕлхе –

Ăна манмастăп ĕмĕрне.

Калаçчăрччĕ манпа куллен

Тус-тăвансем, атте-анне.

Васильева Виктория, 5 класс, Красноармейски шкулĕ