Раççей гербĕ хĕрлĕ тĕслĕ,
Варринче ун – ăмăрт кайăк.
Ăмăрт кайăк ылтăн тĕслĕ,
Икĕ пуçлă, ик çунатлă.

Çуначĕсене вăл сарнă
Пит мăнаçлăн та сулмаклăн.
Варринче, ав, юланутçă –
Курăнать вăл пит хастаррăн.

Çак элем çине пăхсассăн
Палăрать çĕр-шыв шăпийĕ:
Ун кун-çулĕ, ун асапĕ,
Унăн савăнăç-мăнаçĕ.

Çирĕп кайăкăн сăнарĕ:
Раççей çĕрĕ, пĕтĕм халăх,
Питĕ анлă уйĕ-хирĕ –
Иксĕлми пуян патшалăх.

Çунатне сарса вĕçÿçĕн
Йăлт сăнать пек вăйлă кайăк.
Сарлака иккен çĕр-шывăм,
Пур ун тем те – савăнмалăх.

Хĕвел тĕслĕ ăмăрт кайăк
Çĕр питне çутатнăçемĕн
Ешерет чечек те курăк,
Шăранать тем тĕрлĕ кĕвĕ.

Çĕкленет Раççей çĕр-шывĕ,
Хăй чапне сарать инçе вăл.
Малашне те аталанĕ,
Ун хăвачĕ вайлăланĕ.

Раççей гербĕ – ырă символ…
Ун пĕлтерĕшĕ пит пысăк.
Ирĕклĕн, мăнаçлăн, сумлăн
Ыр ĕçсем тума чĕнет вăл.

Надежда Козлова